“Bëdadquio yec icsambo icquin, chotac cuesbededpanëdash Matsesën” queuidequi chotac iccuededec. Adsho tantiash, nëbi caniabo chido buntac chedotsen, “Tsusedpabo icsambo icpanëdash” queuaic, Matses icampid tanquienquio iquec. Adsho issun nëid dadauaid dadauabededombi, “Adpenquio icampic” quequin tantiamenuen. Matses nidaid bedshunte bunquin chotaquëmbien tauampic, Matses cuesquin Matsesën bacuëbo chidobobëta bedshun buanquin-buanquin. Chotaquënquio cuesnanquin bedampic, Matses cuesanenquio icnubi. Matses dadpen cuesquin Matses dadpen chotaquën bedbudnesho issun, Matsesën cuidquin tauampic, aton matsesado aton nidaidbëta cudasquin. Dacuëdenquio yec chotacbëd cuesnanquin aton Matsesadobëta aton nidaid cudasquin chotac cuesquin dëyacquidombo yec dada cuesabombo Matses icampic. Nëid dadauid isquidon aid cuembo tantiabanendac.